ომიდან დაბრუნების შემდეგ, ვლადისლავ რომანეცკის ცხოვრება რთულ რეალობად იქცა.
„დღეში შეიძლება ორი-სამი საათი გეძინოს და თავს მუდმივად საშინლად გრძნობ. წარმოიდგინეთ, თითქოს, დედის დაკრძალვაზე ცხოვრებაში ყველაზე საშინელი ნაბახუსევით მიდიხართ და ყოველდღე თავს ასე გრძნობთ — ეს, ალბათ, ყველაზე უკეთ აღწერს მდგომარეობას, რაზეც ვსაუბრობ“, ამბობს ვლადისლავი.
შემდეგ ვლადისლავმა შუა საუკუნეების საბრძოლო სპორტი აღმოაჩინა.
ვლადისლავი წარმოშობით კრივი-რიჰიდანაა, უკრაინის პრეზიდენტის, ვოლოდიმირ ზელენსკის მშობლიური ქალაქიდან. უკრაინის არმიას 2017 წელს შეუერთდა. 2022 წელს, რუსეთის სრულმასშტაბიანი შეჭრის შემდეგ, ფრონტის ხაზზე საბრძოლო მედიკოსად მსახურობდა ხერსონში, დონეცკსა და ხარკივში.
სამხედრო სამსახურიდან, საარტილერიო დარტყმის შედეგად მრავლობითი ტრავმის მიღების შემდეგ გათავისუფლდა.
სწორედ ამ დროს ახალი პრობლემები დაიწყო — სმენისა და მხედველობის დაქვეითება, უკონტროლო კანკალი, ყოველდღიური საყოფაცხოვრებო მოვლენები პანიკის უეცარ შეტევებს იწვევდა.
„მეგობართან ერთად გარეთ ვიდექი და ვსაუბრობდით, როცა ახლოს მდგომმა ფოტო გადაიღო. განათებისთანავე, ორივე ლამის მიწაზე დავეცით — ტვინმა ეს წამში აფეთქებასთან დააკავშირა“, იხსენებს ვლადისლავი.
ის პოსტტრავმული სტრესული აშლილობით იტანჯებოდა.
სტაციონარული რეაბილიტაციის ცენტრში ყოფნისას, სპეციალისტმა მას ვეტერანების მიერ შექმნილი პროექტის შესახებ უამბო — „ბუჰურტ სიჩზე“, რომლის ფარგლებშიც, შუა საუკუნეების საბრძოლო სპორტს, სტრესთან დაკავშირებული აშლილობების მქონე ვეტერანების დასახმარებლად იყენებენ.
სპორტში შუა საუკუნეებისთვის დამახასიათებელი საბრძოლო აღჭურვილობა, აბჯარი და „ხმლები“ გამოყენება და შერეული საბრძოლო ხელოვნების სტილის ბრძოლები იმართება.
„აბჯარი ავისხი და „ხმლით“ ბრძოლა ვცადე, საოცრად უჩვეულო შეგრძნება იყო“ — ვლადისლავი მაშინვე მოიხიბლა.
„საავადმყოფოს პალატაში ყოფნისას, ვლადმა ჩვენი მწვრთნელის მიერ გამოქვეყნებული ყველა ვიდეო ნახა. შეისწავლა ყველა ტექნიკა, შემდეგ ჩვენთან მოვიდა და მწვრთნელი დაამარცხა — მსოფლიო ჩემპიონი შუა საუკუნეების საბრძოლო სპორტში — თანაც მწვრთნელისვე ილეთებით, რაც ვიდეოში ნახა“, ამბობს „ბუჰურტ სიჩის“ ხელმძღვანელი, ოლენა კრეჩეტი.
კრეჩეტი ამბობს, რომ პოსტტრავმული სტრესული აშლილობის მქონე ადამიანებს, ხშირად, ადრენალინის ჭარბი დონე აქვთ, რაც მათ ჭამასა და ძილსაც კი ურთულებს, „მაგრამ, როცა არენაზე შეაბიჯებ, ადრენალინისგან ბუნებრივად თავისუფლდები“.
ვლადისლავი ახლა ინსტრუქტორია.
„ხშირად, როცა ვარჯიშზე მიდიხარ ცუდად ხარ ან უბრალოდ განწყობა არ გაქვს, მაგრამ აქ ბიჭები ენერგიის ტალღას ქმნიან და შენც მათგან იმუხტები. ეს ენერგიის ერთგვარი გაცვლაა, რითაც ორივე მხარე ძლიერდება. ხშირად, როცა ვარჯიშიდან გამოვდივარ, ვფიქრობ — ალბათ ისინი უფრო დამეხმარნენ, ვიდრე მე მათ“, ამბობს ის.
Forged by War (ომში გამოწრთობილი), Independence Avenue Media-სა და 1+1 პროდაქშენის თანამშრომლობით შექმნილი ხუთეპიზოდიანი დოკუმენტური ფილმების სერიაა. ქვემოთ მოცემულ ეპიზოდში გიამბობთ ვლადისლავზე, რომელმაც ბრძოლის ველიდან, შუა საუკუნეების საბრძოლო სპორტის არენაზე შეაბიჯა.
