ბრიდლოვის თქმით, დროა დასავლეთმა შეწყვიტოს საკუთარი თავის დარწმუნება იმაში, თითქოს მოსკოვს მშვიდობა სურს. Independence Avenue Media-სთან საუბარში, მან უარყო გავრცელებული აზრი, თითქოს რუსეთი იმარჯვებს უკრაინაში და აღნიშნა, რომ პუტინი „არასდროს ყოფილა და არასდროს იქნება მშვიდობის პარტნიორი“.
ბრიდლოვის თქმით, ვაშინგტონი თავად ზღუდავს უკრაინას იმაში, რომ რუსეთის სიღრმეში დარტყმები არ მიიტანოს და ეს მაშინ, როდესაც პუტინი მხოლოდ აძლიერებს უკრაინის წინააღმდეგ აგრესიას. „პუტინი ესკალაციის ესკალაციას ეწევა“, ამბობს გენერალი.
აშშ-ის პრეზიდენტ დონალდ ტრამპის მიერ რუსეთის პრეზიდენტ ვლადიმირ პუტინისთვის მიცემული ვადის შემცირების შემდეგ და ამაზე მიღებული ღია უარის ფონზე, ბრიდლოვი ამბობს, რომ „მშვიდობის მიღწევა შეიძლება მხოლოდ იმასთან, ვისაც ეს სურს. პუტინს კი მშვიდობა არ სურს“.
გენერალი ასევე ყურადღებას ამახვილებს რუსული ბირთვული მუქარებისა და ფსიქოლოგიური ზეწოლის სტრატეგიაზე, რაც ცნობილია, როგორც „რეფლექსური კონტროლი“. მისი თქმით, კრემლი ამ ტაქტიკას წლების განმავლობაში ეფექტიანად იყენებდა და მის გამოყენებას გააგრძელებს.
მიუხედავად იმისა, რომ ბრიდლოვი მიესალმება ნატოს გაძლიერებულ როლს უკრაინისთვის შეიარაღების მიწოდებისა და თავდაცვის დაგეგმვის კოორდინაციაში, ის ხაზგასმით აღნიშნავს, რომ ნატოს გააქტიურებამ ალიანსში ამერიკის როლის შესუსტება არ უნდა გამოიწვიოს.
